Vinnige Kaas Skons

Hierdie skons is regtig ’n vinnige staatmaker, mens kan dit sommer gou voor werk in die oggend maak en dan het mens heerlik ontbyt of vars skons vir ete by die werk. As mens onverwagte gaste kry en gou iets lig wil voorsit saam met koffie of tee, dan is die net die resep daarvoor.

Die resep het ek by Tannie Huibrecht Eksteen gekry, sy het dit so gegee: “Die resep vat ’n koppie meel, koppie melk, een eier en so bietjie olie, sout en bakpoeier en so handjie kaas.”

Dit is mos hoe ons Oumas kos maak, so bietjie van die en so bietjie van dat. Wel, dit is hoe ek altyd gedink het en op die ou end maak mens mos self so, dan vra iemand jou die resep en dan begin mens ook wonder hoeveel het ek nou eintlik ingesit!

Ek probeer maar as ek iets nuut maak, klaar die hoeveelhede neerskryf van wat ek insit sodat mens kan weet na watter mate om die resep aan te pas as mens dit graag weer wil maak. Hoeveel keer maak mens nie iets en kry dit net nooit weer so gemaak nie, want die belangrikste bestanddeel het vergete agtergebly?

Hier is die resep:

Vinnige Kaas Skons

Bestanddele:

1 Koppie Melk
1 Koppie Koekmeel
1 Eier
10ml Olie
3ml Sout
10ml Bakpoeier
Handjie Kaas (soos verkies)

Metode:

Meng al die nat bestanddele in ’n maatbeker, voeg nou die koekmeel, sout en bakpoeier by. Meng goed totdat daar geen klontjies oor is nie. Gooi die handjie kaas by en roer deur.

Giet loperige deeg in ’n voorbereide vormkoekie pan en bak vir ± 20 minute by 200°C.

Lewer 12 skons.

Geniet!

3 Responses to “Vinnige Kaas Skons”

  1. Wonderful and so easy to make, real grate taste,next time will just make it 2 hands full of cheese

    Reply

Leave a Reply

XHTML: You can use these tags: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>